بیٹے کا نام تیمور رکھے جانے پر ہنگامہ ، بالآخر کرینہ کپور نے بھی خاموش توڑ دی

• 
• 

ممبئی( آن لائن ) بالی ووڈ اداکارہ کرینہ کپور نے اپنے بیٹے کے نام کو متنازعہ بنانے پر حیرانی کا اظہار کرتے ہوئے کہا کہ ’’تیمور علی خان‘‘ کی کسی زندہ یا مردہ شخصیت سے کوئی مماثلت نہیں ۔

اداکارہ کرینہ کپور سیف علی خان کے ساتھ شادی کے بعد سے ہی میڈیا کا موضوع بنتی رہی ہیں ، پہلے انہیں سیف کے ساتھ شادی پر تنقید کا نشانہ بنایا جاتا رہا، بعد میں حاملہ ہونے کے باوجود  فلمی دنیا کو خیرآباد نہ کہہ کر انہوں نے  پھر سے سب کی توجہ حاصل کی ۔ماں بننے کے بعد بیٹے کا نام ’’تیمور علی خان‘‘ رکھنے پر توبھارت میں ایک تنازعہ کھڑا ہوگیا تھا۔بیٹے کے نام کو متنازعہ بنانے پر سیف علی خان پہلے ہی وضاحت دے چکے ہیں جس میں ان کا کہنا تھا کہ ہمارے بیٹے کے نام اور شہنشاہ تیمور میں بہت فرق ہے، تیمور ایک قدیم نام ہے جس کا مطلب فولاد کے ہیں، میں اور میری اہلیہ نے بہت سوچ سمجھ کر اور اس  کا مطلب جان کر ہی یہ نام رکھا ہے۔ کرینہ کپور نے بھی بیٹے کی پیدائش کے 46 دن بعد اس حوالے سے خاموشی توڑتے ہوئے کہا کہ مجھے تو اس بات سے حیرانی ہوئی کہ لوگ کیوں ہمارے بیٹے کے نام کو اچھال رہے ہیں جب کہ ہم نے تو ’’تیمور‘‘ نام صرف اس لیے رکھا کہ اس کا مطلب عربی میں فولاد کے ہیں اور اس کی  کسی زندہ یا مردہ شخصیت سے کوئی مماثلت نہیں ۔

دوسری جانب کرینہ کپور نے ماں بننے کے صرف 46 دن بعد ہی فلم نگری میں واپسی کرتے ہوئے گزشتہ روز ایک فیشن شو میں شرکت کی اور اب وہ سونم کپور کے ساتھ فلم ’’ویر دی ویڈنگ‘‘ میں اداکاری کے جوہر دکھائیں گی۔واضح رہے کہ بھارت کے متنازعہ مصنف طارق فاتح نے سیف علی اور کرینہ کپور کے بیٹے کے حوالے سے ٹوئٹ کرکے بھارت میں تنازعہ کھڑا کردیا تھا، ان کا کہنا تھا کہ کرینہ کپور ان پڑھ یا مغرور ہیں جنہوں نے بیٹے کا نام ہندوستانیوں کے قاتل تیمور کے نام پر رکھ دیا ہے جس سے اس کی وہی شناخت بنے گی۔